Efallai yr hoffech chi hefyd
Cafodd yr UC 31 ei chomisiynu ar 2 Medi 1916. Aeth ar 13 phatrôl a suddodd 28 o longau, gan gynnwys yr agerlong Brydeinig ETHELINDA 15 milltir i’r gogledd-orllewin o Ynysoedd y Moelrhoniaid ar 29 Ionawr 1918. Ffynhonnell: 9Q19323, Imperial War Museum.
Agerlong a oedd yn cludo glo Cymreig o’r Barri i Alexandria yn yr Aifft oedd yr HOPEMOUNT. Cafodd ei suddo gan yr U 35. Tynnwyd y llun hwn o’r criw a oroesodd ar ôl iddynt lanio’n ddiogel mewn porthladd yn ne Cymru. Roedd wyth o griw’r HOPEMOUNT yn hanu o Orllewin Affrica. Ffynhonnell: Archifau Morgannwg.
Roedd Jane Roberts yn gweithio fel nyrs ar y SALTA, llong ysbyty a suddwyd gan dorpido ar 10 Ebrill 1917 ym Môr y Canoldir. Mae cofeb iddi yn eglwys y plwyf Tywyn. Ffynhonnell: WWC_H21_6_1_1, Imperial War Museum.
Menter ar y cyd rhwng Comisiwn Brenhinol Henebion Cymru, Prifysgol Bangor a’r Gymdeithas Archaeoleg Forwrol i goffáu’r rheiny a wasanaethodd ar y môr yn ystod y Rhyfel Mawr yw’r Prosiect Llongau-U 1914-18.
Mae’r partneriaid yn y prosiect wedi defnyddio’r technegau delweddu tanddwr diweddaraf i archwilio llongau a gollwyd ar hyd arfordir Cymru o ganlyniad I ymosodiadau gan longau tanfor. Mae’r safleoedd a ddewiswyd yn sampl bach o’r 155 o longau a suddwyd, ond mae eu storïau’n adlewyrchu llawer o’r agweddau allweddol ar y brwydro.
Mae’r teyrngedau i’r arwyr ac arwresau cyffredin y rhoddir sylw iddynt yn yr arddangosfa hon wedi cael eu hawgrymu gan unigolion, grwpiau cymunedol, a’r rhwydwaith o amgueddfeydd ar hyd arfordir Cymru.